ଦେଶରେ ମ୍ୟାଲେରିଆରେ ଓଡ଼ିଶା ପ୍ରଥମ: ଦମନ ପାଇଁ ଆସିବ ନୂଆ ରଣନୀତି

ସୁନ୍ଦରଗଡ଼ ଲାଇଭ୍ : ଓଡ଼ିଶାରେ ପୁଣି ମ୍ୟାଲେରିଆ ସଂକ୍ରମଣ ଚିନ୍ତାଜନକ ଭାବେ ବୃଦ୍ଧି ପାଇବାରେ ଲାଗିଛି। ଜାତୀୟ ଭେକ୍ଟର ଜନିତ ରୋଗ ନିୟନ୍ତ୍ରଣ କେନ୍ଦ୍ର (NCVBDC) ର ସମ୍ପ୍ରତି ରିପୋର୍ଟ ଅନୁଯାୟୀ, ଦେଶରେ ମ୍ୟାଲେରିଆ ଆକ୍ରାନ୍ତଙ୍କ ସଂଖ୍ୟାରେ ଓଡ଼ିଶା ଶୀର୍ଷ ସ୍ଥାନରେ ରହିଛି। ଚଳିତ ବର୍ଷ ଜୁଲାଇ ଶେଷ ସୁଦ୍ଧା ଦେଶରେ ମୋଟ ୧ ଲକ୍ଷ ୯ ହଜାରରୁ ଅଧିକ ମ୍ୟାଲେରିଆ ରୋଗୀ ଚିହ୍ନଟ ହୋଇଥିବା ବେଳେ ୨୬ ଜଣଙ୍କ ମୃତ୍ୟୁ ଘଟିଛି। ଏଥିମଧ୍ୟରୁ କେବଳ ଓଡ଼ିଶାରେ ସର୍ବାଧିକ ୩୦,୨୬୮ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ଏବଂ ୬ ଜଣଙ୍କ ମୃତ୍ୟୁ ଘଟିଛି।

ସୂଚନାଯୋଗ୍ୟ ଯେ, ୨୦୨୨ରୁ ୨୦୨୪ ମଧ୍ୟରେ ରାଜ୍ୟରେ ମ୍ୟାଲେରିଆ ସଂକ୍ରମଣ ପ୍ରାୟ ୩ ଗୁଣ ବୃଦ୍ଧି ପାଇଥିଲା। ୨୦୨୪ରେ ୬୮,୬୯୩ଟି ମାମଲା ଏବଂ ୨୦୨୫ରେ ୬୨,୧୩୭ଟି ମାମଲା ସହ ଓଡ଼ିଶା ଦେଶରେ ଶୀର୍ଷରେ ଥିଲା।

ରାଜ୍ୟ / ଜିଲ୍ଲା	ଚିହ୍ନଟ ମ୍ୟାଲେରିଆ ମାମଲା
ରାଜ୍ୟ ସ୍ତରରେ (ଦେଶର ଅନ୍ୟ ପ୍ରମୁଖ ରାଜ୍ୟ)
ଓଡ଼ିଶା	୩୦,୨୬୮
ଝାଡ଼ଖଣ୍ଡ	୨୬,୩୯୯
ଚଣ୍ଡିଗଡ଼	୧୪,୦୨୨
ମହାରାଷ୍ଟ୍ର	୮,୮୯୮
ଆନ୍ଧ୍ରପ୍ରଦେଶ	୬,୪୧୪
ମିଜୋରାମ	୫,୯୯୧
ଓଡ଼ିଶାର ପ୍ରଭାବିତ ଜିଲ୍ଲା
କଳାହାଣ୍ଡି	୧୩,୦୩୪ (ସର୍ବାଧିକ)
ରାୟଗଡ଼ା	୧୦,୯୧୩
କନ୍ଧମାଳ	୮,୩୪୨
କୋରାପୁଟ	୬,୯୫୦
ମାଲକାନଗିରି	୬,୫୩୩
ମୟୂରଭଞ୍ଜ	୫,୦୦୦

ମ୍ୟାଲେରିଆର କ୍ରମବର୍ଦ୍ଧିଷ୍ଣୁ ସଂକ୍ରମଣକୁ ରୋକିବା ପାଇଁ ରାଜ୍ୟ ସରକାର ନୂଆ ରଣନୀତି ପ୍ରସ୍ତୁତ କରୁଛନ୍ତି। ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସଚିବ ଅସ୍ୱତୀ ଏସ୍‌ଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ରାଜ୍ୟ ପାଇଁ ଏକ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ବିଶେଷଜ୍ଞ ବୈଷୟିକ ଦଳ (Specialist Technical Team) ଗଠନ କରିବାକୁ ନିଷ୍ପତ୍ତି ନିଆଯାଇଛି।