admin
ସୁନ୍ଦରଗଡ଼ ଲାଇଭ୍ : ଭାରତ ଏବଂ ବାଂଲାଦେଶ ମଧ୍ୟରେ ଯାତ୍ରା କରୁଥିବା ଯାତ୍ରୀଙ୍କ ପାଇଁ ଏକ ବଡ଼ ଖୁସି ଖବର ସାମ୍ନାକୁ ଆସିଛି। ଦୁଇ ଦେଶ ମଧ୍ୟରେ ପୁଣି ଥରେ ରେଳ ସେବା ଆରମ୍ଭ କରିବା ସହ ଏକ ନୂତନ ଟ୍ରେନ୍ ଚଳାଇବା ପାଇଁ ପ୍ରସ୍ତୁତି ଜୋରଦାର ହେଉଛି। ଆସନ୍ତା ଅକ୍ଟୋବର ମାସ ସୁଦ୍ଧା ବନ୍ଦ ରହିଥିବା ଟ୍ରେନ୍ଗୁଡ଼ିକ ପୁଣି ଟ୍ରାକ୍କୁ ଫେରିବା ନେଇ ଆଶା କରାଯାଉଛି।
ଏହି ପରିପ୍ରେକ୍ଷୀରେ ଭାରତ ଓ ବାଂଲାଦେଶର ରେଳ ଅଧିକାରୀଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବାକୁ ଯାଉଛି। ଏହି ବୈଠକରେ ବାଂଲାଦେଶର ରାଜଶାହୀରୁ କୋଲକାତା ମଧ୍ୟରେ ଏକ ନୂତନ ଟ୍ରେନ୍ ଚଳାଇବା ପାଇଁ ପ୍ରସ୍ତାବ ଦିଆଯିବ। ଏହାସହିତ ପୂର୍ବରୁ ବନ୍ଦ ରହିଥିବା ମୈତ୍ରୀ ଏକ୍ସପ୍ରେସ, ମିତାଲୀ ଏକ୍ସପ୍ରେସ ଏବଂ ବନ୍ଧନ ଏକ୍ସପ୍ରେସକୁ ପୁଣି ଥରେ ଚଳାଇବାକୁ ନିଷ୍ପତ୍ତି ନିଆଯାଇପାରେ।
ଅନ୍ୟପଟେ ମୈତ୍ରୀ ଏକ୍ସପ୍ରେସର ରୁଟ୍ରେ ପରିବର୍ତ୍ତନ ହେବାର ସମ୍ଭାବନା ରହିଛି। ପୂର୍ବରୁ ଏହା ଯମୁନା ବ୍ରିଜ୍ ଦେଇ ଯାଉଥିବା ବେଳେ ଏବେ ବାଂଲାଦେଶ ଏହାକୁ ପଦ୍ମା ବ୍ରିଜ୍ ଦେଇ ଚଳାଇବାକୁ ଆଗ୍ରହ ଦେଖାଇଛି। ତେବେ ଉଭୟ ଦେଶର ସମ୍ମତି ପରେ ହିଁ ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ।
ସୂଚନାଯୋଗ୍ୟ ଯେ, ଜୁଲାଇ ୨୦୨୪ରେ ବାଂଲାଦେଶରେ ହୋଇଥିବା ବ୍ୟାପକ ହିଂସା ଏବଂ ରାଜନୈତିକ ଅସ୍ଥିରତା କାରଣରୁ ସୁରକ୍ଷା ଦୃଷ୍ଟିରୁ ଏହି ଟ୍ରେନ୍ ସେବାକୁ ବନ୍ଦ ରଖାଯାଇଥିଲା। ଏବେ ପୁଣି ଥରେ ରେଳ ଚଳାଚଳ ଆରମ୍ଭ ହେଲେ ଦୁଇ ଦେଶ ମଧ୍ୟରେ ଯାତାୟାତ ସହଜ ହେବା ସହ ବାଣିଜ୍ୟିକ ସମ୍ପର୍କ ସୁଦୃଢ଼ ହେବ ଏବଂ ସାଧାରଣ ଜନତା ବିଶେଷ ଭାବେ ଉପକୃତ ହେବେ।
