୨୪,୭୦୦ କୋଟି ଟଙ୍କାର ପ୍ରଥମ ଶିପ୍‌ବିଲ୍ଡିଂ କ୍ଲଷ୍ଟର ପ୍ରକଳ୍ପକୁ କେନ୍ଦ୍ରର ମଞ୍ଜୁରୀ

ସୁନ୍ଦରଗଡ଼ ଲାଇଭ୍: ଓଡ଼ିଶାରେ ନିର୍ମାଣ ହେବ ବୃହତ୍ ପଣ୍ୟବାହୀ ଜାହାଜ। କେନ୍ଦ୍ର ଜାହାଜ ଚଳାଚଳ ଏବଂ ଜଳପଥ ମନ୍ତ୍ରାଳୟର ‘ଜାହାଜ ନିର୍ମାଣ ବିକାଶ ଯୋଜନା’ ଅଧୀନରେ ନ୍ୟାସନାଲ ସିପବିଲ୍ଡିଂ ଆଣ୍ଡ ହେଭି ଇଣ୍ଡଷ୍ଟ୍ରିଜ୍ ପାର୍କ ଓଡ଼ିଶା ଲିମିଟେଡକୁ ପ୍ରସ୍ତାବିତ ୨୪,୭୦୦ କୋଟି ଟଙ୍କାର ପ୍ରକଳ୍ପ ପାଇଁ ଅନୁମୋଦନ ମିଳିଛି। ଏହି ବିରଳ ସଫଳତା ସମ୍ପର୍କରେ ରାଜ୍ୟ ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ ସୂଚନା ଦେଇଛନ୍ତି।

କେନ୍ଦ୍ରାପଡ଼ା ଜିଲ୍ଲାର ପାରାଦୀପ ଇଫକୋ ପ୍ଲାଣ୍ଟ ନିକଟସ୍ଥ ମହାନଦୀର ଉତ୍ତର କୂଳରେ ରାଜ୍ୟର ଏହି ପ୍ରଥମ ପ୍ରମୁଖ ଜାହାଜ ନିର୍ମାଣ କ୍ଲଷ୍ଟର ସ୍ଥାପିତ ହେବ। ଏହି ବୃହତ୍ ପ୍ରକଳ୍ପ ଓଡ଼ିଶାର ଶତାବ୍ଦୀ ପୁରୁଣା ସାମୁଦ୍ରିକ ଓ ନୌବାଣିଜ୍ୟ ଐତିହ୍ୟକୁ ଏକ ନୂତନ ଶିଳ୍ପଗତ ପରିଚୟ ଦେବାକୁ ଯାଉଛି।

ଓଡ଼ିଶା ନୌବାଣିଜ୍ୟ ବୋର୍ଡ ଏବଂ ପାରାଦୀପ ବନ୍ଦର କର୍ତ୍ତୃପକ୍ଷ (PPA)ଙ୍କ ମିଳିତ ସହଯୋଗରେ ଏକ ସ୍ୱତନ୍ତ୍ର ଉଦ୍ଦେଶ୍ୟ ଯାନ (SPV) ମାଧ୍ୟମରେ ଏହାର ବିକାଶ କରାଯିବ। ପ୍ରାୟ ୨୦୦୦ରୁ ୨୫୦୦ ଏକର ପରିମିତ ଜମିରେ ୨ରୁ ୨.୫ କିଲୋମିଟର ଦୀର୍ଘ ସମର୍ପିତ ଜଳପ୍ରାନ୍ତ (Waterfront) ସହ ଏହା ନିର୍ମାଣ କରାଯିବ। କ୍ଲଷ୍ଟରରେ ପ୍ରତିବର୍ଷ ପ୍ରାୟ ୧.୨ ନିୟୁତ ମୋଟ ଟନ୍ (GT) ଜାହାଜ ନିର୍ମାଣ କ୍ଷମତା ରହିବ। ଏଠାରେ ଜାହାଜ ନିର୍ମାଣ ଓ ମରାମତି ସହ ଇଞ୍ଜିନ ନିର୍ମାଣ, ଇସ୍ପାତ ପ୍ରକ୍ରିୟାକରଣ, ସାମୁଦ୍ରିକ ଉପକରଣ ଯୋଗାଣ ଭଳି ଆନୁଷଙ୍ଗିକ ଶିଳ୍ପ, ତାଲିମ କେନ୍ଦ୍ର ଏବଂ ଗବେଷଣା-ବିକାଶ (R&D) ଭିତ୍ତିଭୂମି ସ୍ଥାପନ କରାଯିବ।