admin
ସୁନ୍ଦରଗଡ଼ ଲାଇଭ୍: ଓଡ଼ିଶାକୁ ବିକାଶର ନୂଆ ଶିଖରରେ ପହଞ୍ଚାଇବା ସହ ‘ବିକଶିତ ଭାରତ’ ସ୍ୱପ୍ନକୁ ସାକାର କରିବା ପାଇଁ ରାଜ୍ୟ ସରକାର ଏକ ଯୁଗାନ୍ତକାରୀ କଦମ ଉଠାଇଛନ୍ତି। ରାଜ୍ୟରେ ଖୁବଶୀଘ୍ର ଆରମ୍ଭ ହେବ ଭୁବନେଶ୍ୱର-କଟକ-ପୁରୀ-ପାରାଦୀପ ସିଟି ଇକୋନୋମିକ୍ ରିଜିଅନ୍ ପ୍ରକଳ୍ପ। ରାଜ୍ୟକୁ କେନ୍ଦ୍ରୀୟ ସହାୟତା ଓ ଋଣ ମିଳିବା ପୂର୍ବରୁ ନିଜସ୍ୱ ଅର୍ଥରେ ଆରମ୍ଭ ହେବ ପ୍ରକଳ୍ପ। ଏ ନେଇ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ। ସେ କହିଛନ୍ତି BKPPER ପ୍ରକଳ୍ପକୁ ଗତକାଲି ରାଜ୍ୟସ୍ତରୀୟ ପ୍ରୋଜେକ୍ଟ ମନିଟରିଂ କମିଟିରେ ମିଳିଥିଲା ଅନୁମୋଦନ। ଏହି ପ୍ରକଳ୍ପ ପାଇଁ ମୋଟ ୫,୦୦୦ କୋଟି ଟଙ୍କା ଖର୍ଚ୍ଚ ହେବ। କେନ୍ଦ୍ରୀୟ ସହାୟତା ମିଳିବା ପୂର୍ବରୁ ରାଜ୍ୟ ସରକାର ନିଜସ୍ୱ ଅର୍ଥରେ ଏହାର କାର୍ଯ୍ୟ ଆରମ୍ଭ କରିବେ।
ପ୍ରକଳ୍ପ ପାଇଁ କେନ୍ଦ୍ର ସରକାରଙ୍କ ଠାରୁ ୧,୪୦୦ କୋଟି ଟଙ୍କାର ସହାୟତା ମିଳିବାକୁ ଥିବାବେଳେ ବାକି ୩,୪୦୦ କୋଟି ଟଙ୍କା ରାଜ୍ୟ ସରକାର ବ୍ୟାଙ୍କରୁ ଋଣ ଆକାରରେ ନେବେ। ଏହି ଯୋଜନା ମାଧ୍ୟମରେ ୪ଟି ସହର ଭୁବନେଶ୍ୱର-କଟକ-ପୁରୀ-ପାରାଦୀପକୁ ମିଶାଇ ସମ୍ମିଳିତ ବିକାଶ କରାଯିବ। ଏହାଦ୍ୱାରା ଅଞ୍ଚଳର ଭିତ୍ତିଭୂମି, ଶିଳ୍ପ ଓ ପର୍ଯ୍ୟଟନର ପ୍ରଗତି ସହ ବ୍ୟାପକ ସହରୀକରଣ କରାଯିବ। ରାଜ୍ୟ ସରକାରଙ୍କ ଓଡ଼ିଶା ଭିଜନ୍-୨୦୩୬ ଓ ଭିଜନ୍-୨୦୪୭ରେ ସହରୀକରଣକୁ ଅର୍ଥନୈତିକ ବିକାଶର ପ୍ରମୁଖ ଇଞ୍ଜିନ୍ ଭାବେ ଚିହ୍ନଟ କରାଯାଇଛି। ମୋଟାମୋଟି ଭାବେ, ଏହି ପ୍ରକଳ୍ପ ଜରିଆରେ ପ୍ରମୁଖ ସହରଗୁଡ଼ିକୁ ସଂଯୋଗ କରି ଏକ ସମୃଦ୍ଧ ଆର୍ଥିକ କରିଡର ଗଢ଼ିତୋଳିବା ସହ ବ୍ୟାପକ ନିଯୁକ୍ତି, ବଳିଷ୍ଠ ଭିତ୍ତିଭୂମି ଓ ଗମନାଗମନର ସୁବିଧା ଯୋଗାଇ ଦେବାକୁ ଲକ୍ଷ୍ୟ ରଖାଯାଇଛି।
