admin
ସୁନ୍ଦରଗଡ଼ ଲାଇଭ୍: ଧାନ ସଂଗ୍ରହ ପ୍ରକ୍ରିୟାକୁ ସ୍ୱଚ୍ଛ କରିବା ପାଇଁ ସରକାର ଲାଗୁ କରିଥିବା ନୂଆ ‘ଏଗ୍ରିଷ୍ଟାକ୍’ ବ୍ୟବସ୍ଥା ଓ କଠୋର ପଞ୍ଜୀକରଣ ନିୟମ ଏବେ ଚାଷୀଙ୍କ ପାଇଁ କାଳ ସାଜିଛି। କଳାହାଣ୍ଡିର ଜୟପାଟଣାରୁ ଆରମ୍ଭ କରି ବରଗଡ଼ ଓ ପୁରୀର ଅସ୍ତରଙ୍ଗ ପର୍ଯ୍ୟନ୍ତ ସବୁଠି ପ୍ରକୃତ ଚାଷୀ ଓ ଭାଗ ଚାଷୀମାନେ ନାହିଁ ନଥିବା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ନିଜ ନାଁରେ ଜମି ପଟ୍ଟା ରହିବା ବାଧ୍ୟତାମୂଳକ କରାଯାଇଥିବାରୁ ବାପା-ଅଜାଙ୍କ ଜମିରେ ଚାଷ କରୁଥିବା ଏବଂ ଭାଗ ଚାଷୀଙ୍କ ନିଦ ହଜିଯାଇଛି। ବିଶେଷ କରି ଭାଗ ଚାଷୀଙ୍କ ପଞ୍ଜୀକରଣ ପାଇଁ ଜମି ମାଲିକଙ୍କ ‘ଆଖି ସ୍କାନ୍’ (Iris Scan) ବାଧ୍ୟତାମୂଳକ ହୋଇଥିବା ବେଳେ, ସହରରେ ରହୁଥିବା ଜମି ମାଲିକମାନେ ଆସୁନଥିବାରୁ ଚାଷୀମାନେ ସମ୍ପୂର୍ଣ୍ଣ ଅସହାୟ ହୋଇପଡ଼ିଛନ୍ତି।
ଅନ୍ୟପଟେ, ନେଟୱର୍କ ସମସ୍ୟା, କ୍ରମାଗତ ସର୍ଭର ଡାଉନ୍ ଏବଂ ଆଧାର ସହ ବ୍ୟାଙ୍କ ଆକାଉଣ୍ଟ ଲିଙ୍କ୍ ନହେବା ଭଳି ପ୍ରାବିଧିକ ତ୍ରୁଟି ଯୋଗୁଁ ଜନସେବା କେନ୍ଦ୍ର ଓ ପ୍ୟାକ୍ସ ସମ୍ମୁଖରେ ଚାଷୀଙ୍କ ଅସମ୍ଭବ ଭିଡ଼ ଜମୁଛି। ଜୟପାଟଣାର ୫ଟି ସମବାୟ ସମିତିରେ ପ୍ରଥମ ୬ ଦିନରେ ମାତ୍ର ୧.୯୪ ପ୍ରତିଶତ ଚାଷୀ ଆବେଦନ କରିପାରିଥିବା ବେଳେ ୧୩ ହଜାରରୁ ଅଧିକ ଚାଷୀ କାଗଜପତ୍ର ଯୋଗାଡ଼ରେ ନାକେଦମ୍ ହେଲେଣି। ସରକାରୀ ନିୟମ କୋହଳ ନହେଲେ ଏବଂ ବ୍ୟବସ୍ଥାରେ ସୁଧାର ନଆସିଲେ ଆଗାମୀ ଦିନରେ ରାଜ୍ୟବ୍ୟାପୀ ଚାଷୀ ଆନ୍ଦୋଳନ ହେବ ବୋଲି ଚେତାବନୀ ଦିଆଯାଇଛି।
