admin
ସୁନ୍ଦରଗଡ଼ ଲାଇଭ୍: ଉତ୍ତର ଓଡ଼ିଶାର ବିଭିନ୍ନ ଜିଲ୍ଲାରେ ଲଗାଣ ବର୍ଷା ଏବଂ ଉପରମୁଣ୍ଡରୁ ଆସୁଥିବା ବନ୍ୟାଜଳ ଯୋଗୁଁ ସ୍ଥିତି ଗମ୍ଭୀର ହୋଇପଡ଼ିଛି। ବୈତରଣୀ, ସାଳନ୍ଦୀ, ଜଳକା, ବୁଢ଼ାବଳଙ୍ଗ ଓ ସୁବର୍ଣ୍ଣରେଖା ନଦୀରେ ଜଳସ୍ତର କ୍ରମାଗତ ଭାବେ ବୃଦ୍ଧି ପାଉଛି। ବାଲେଶ୍ୱର, ଭଦ୍ରକ, ଯାଜପୁର, କେନ୍ଦୁଝର ଓ ମୟୂରଭଞ୍ଜ ଜିଲ୍ଲାର ପ୍ରାୟ ୪୫ଟି ପଞ୍ଜାୟତ ବନ୍ୟାରେ ପ୍ରଭାବିତ ହୋଇଥିବା ବେଳେ ପ୍ରଶାସନ ପକ୍ଷରୁ ବ୍ୟାପକ ଉଦ୍ଧାର ଓ ସ୍ଥାନାନ୍ତରଣ କାର୍ଯ୍ୟ ଜାରି ରହିଛି।
ବୈତରଣୀ ନଦୀର ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ବଡ଼ ବନ୍ୟା ଆସିଛି। କେନ୍ଦୁଝର ଜିଲ୍ଲା ଆନନ୍ଦପୁରଠାରେ ନଦୀର ବିପଦ ସଙ୍କେତ ୩୮.୩୬୦ ମିଟର ଥିବା ବେଳେ ବନ୍ୟାଜଳ ୪୦.୨୫୦ ମିଟରରେ ପ୍ରବାହିତ ହେଉଛି, ଯାହାକି ବିପଦ ସଙ୍କେତଠାରୁ ୧.୮୯ ମିଟର ଉପରେ ରହିଛି। ଆନନ୍ଦପୁର ରିଙ୍ଗ ରୋଡ୍ରେ ଘାଇ ସୃଷ୍ଟି ହୋଇ ବନ୍ୟାପାଣି ପ୍ରବେଶ କରିବା ଯୋଗୁଁ ଘସିପୁରା ବ୍ଲକର ଅନେକ ଅଞ୍ଚଳ ଜଳମଗ୍ନ ହୋଇଛି ଏବଂ ଆନନ୍ଦପୁର ପୌରପରିଷଦ ୧୩ ନମ୍ବର ୱାର୍ଡର ସାଉଁନ୍ତି ସାହି ସମ୍ପୂର୍ଣ୍ଣ ପ୍ରଭାବିତ ହୋଇଛି। ସେହିପରି ଝାଡ଼ଖଣ୍ଡରେ ପ୍ରବଳ ବର୍ଷା ଯୋଗୁଁ ସୁବର୍ଣ୍ଣରେଖା ନଦୀର ଜଳସ୍ତର ବୃଦ୍ଧି ପାଉଥିବା ବେଳେ ବାଲେଶ୍ୱରରେ ବୁଢ଼ାବଳଙ୍ଗ ନଦୀ ମଧ୍ୟ ବିପଦ ସଙ୍କେତ ଅତିକ୍ରମ କରିଛି। ତେବେ ବାରିପଦା ଓ ବେତନଟୀ ଅଞ୍ଚଳରେ ଜଳସ୍ତର ଧୀରେ ଧୀରେ କମିବା ଆଶା କରାଯାଉଛି।
ବାଲେଶ୍ୱର ସଦର ଓ ରେମୁଣା ବ୍ଲକର ପ୍ରାୟ ୧୫ଟି ପଞ୍ଚାୟତରେ ବନ୍ୟା ପ୍ରଭାବ ପଡ଼ିଥିବା ବେଳେ ଭୋଗରାଇ ଓ ବସ୍ତା ବ୍ଲକକୁ ମଧ୍ୟ ସତର୍କ କରାଯାଉଛି। ମୟୂରଭଞ୍ଜ, ଯାଜପୁର ଓ ଭଦ୍ରକ ଜିଲ୍ଲାର ତଳିଆ ଅଞ୍ଚଳଗୁଡ଼ିକ ମଧ୍ୟ ବନ୍ୟାପାଣି ଦ୍ୱାରା ପ୍ରଭାବିତ ହୋଇଛି।
ବନ୍ୟା ପରିସ୍ଥିତିର ମୁକାବିଲା ପାଇଁ ମୋଟ ୧୦ଟି ଓଡ୍ରାଫ୍ (ODRAF) ଓ ୭ଟି ଏନ୍ଡିଆରଏଫ୍ (NDRF) ସମେତ ୧୭ଟି ଉଦ୍ଧାରକାରୀ ଟିମ୍ ମୁତୟନ କରାଯାଇଛି। ସେଥିମଧ୍ୟରୁ ବାଲେଶ୍ୱରରେ ୮ଟି, ଯାଜପୁରରେ ୩ଟି, ଭଦ୍ରକରେ ୨ଟି ଏବଂ କେନ୍ଦୁଝରରେ ଗୋଟିଏ ଟିମ୍ ନିୟୋଜିତ ଥିବା ବେଳେ ଅତିରିକ୍ତ ୪ଟି ଟିମ୍କୁ ପ୍ରସ୍ତୁତ ରଖାଯାଇଛି। ପ୍ରଭାବିତ ଅଞ୍ଚଳଗୁଡ଼ିକରେ ରିଲିଫ୍ ସେଣ୍ଟର ଖୋଲାଯାଇ ପ୍ରାୟ ୩,୦୦୦ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ବୋଲି ଏସ୍ଆର୍ସି ରାଜେଶ ପ୍ରଭାକର ପାଟିଲ ସୂଚନା ଦେଇଛନ୍ତି। ଜିଲ୍ଲାପାଳ ଓ ବରିଷ୍ଠ ଅଧିକାରୀମାନେ ଗ୍ରାଉଣ୍ଡରେ ସ୍ଥିତି ଉପରେ କଡ଼ା ନଜର ରଖିଛନ୍ତି ଏବଂ ମଧ୍ୟମ ଧରଣର ବନ୍ୟାର ସାମ୍ନା କରିବାକୁ ପ୍ରଶାସନ ସମ୍ପୂର୍ଣ୍ଣ ପ୍ରସ୍ତୁତ ରହିଛି।
