admin
ସୁନ୍ଦରଗଡ଼ ଲାଇଭ୍: ରାଜ୍ୟ ପୋଲିସ ମହାନିର୍ଦ୍ଦେଶକ (ଡିଜିପି) ୱାଇ. ବି. ଖୁରାନିଆଙ୍କ ଅବସର ପରେ ୧୯୯୩ ବ୍ୟାଚର ବରିଷ୍ଠ ଆଇପିଏସ୍ ଅଧିକାରୀ ବିନୟତୋଷ ମିଶ୍ରଙ୍କୁ ଓଡ଼ିଶା ଡିଜିପି ଭାବେ ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଛି। ସ୍ଥାୟୀ ଡିଜିପି ନିଯୁକ୍ତ ନହେବା ପର୍ଯ୍ୟନ୍ତ ସେ ଏହି ଶୀର୍ଷ ପଦବୀର ଦାୟିତ୍ୱ ତୁଲାଇବେ ବୋଲି ଗୃହ ବିଭାଗ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି।
ପୂର୍ବତନ ଡିଜିପି ଖୁରାନିଆଙ୍କ ଦୀର୍ଘ ସେବାକାଳ ମଧ୍ୟରେ ରାଜ୍ୟରେ ଆଇନ ଶୃଙ୍ଖଳା ରକ୍ଷା ଓ ମାଓ ଦମନ କ୍ଷେତ୍ରରେ ବିଶେଷ ସଫଳତା ମିଳିଥିଲା। ତାଙ୍କ ଅବସର ପରେ ପ୍ରଶାସନିକ କାର୍ଯ୍ୟକୁ ସୁରୁଖୁରୁରେ ପରିଚାଳନା କରିବା ପାଇଁ ସରକାର ଅଭିଜ୍ଞ ଅଧିକାରୀ ବିନୟତୋଷ ମିଶ୍ରଙ୍କ ଉପରେ ଭରସା ପ୍ରକଟ କରିଛନ୍ତି। ନିଜର ଦୀର୍ଘ ଦିନର ପ୍ରଶାସନିକ ଅଭିଜ୍ଞତା ବଳରେ ସେ ରାଜ୍ୟର ଆଇନ ଶୃଙ୍ଖଳା ସ୍ଥିତିକୁ ଅଧିକ ସୁଦୃଢ଼ କରିବେ ବୋଲି ଆଶା କରାଯାଉଛି।
ନୂଆ ଦାୟିତ୍ୱ ଗ୍ରହଣ କରିବା ପରେ ଶ୍ରୀ ମିଶ୍ର ସ୍ପଷ୍ଟ କରିଛନ୍ତି ଯେ ରାଜ୍ୟବାସୀଙ୍କୁ ସୁରକ୍ଷିତ ପରିବେଶ ଯୋଗାଇବା, ମହିଳା ଓ ଶିଶୁଙ୍କ ବିରୋଧରେ ହେଉଥିବା ଅପରାଧକୁ କଠୋର ହସ୍ତରେ ଦମନ କରିବା ଏବଂ ସାଇବର ଠକେଇ ରୋକିବା ତାଙ୍କର ମୁଖ୍ୟ ପ୍ରାଥମିକତା ହେବ। ଅନ୍ୟପକ୍ଷରେ, ରାଜ୍ୟ ସରକାର ଖୁବ୍ଶୀଘ୍ର ସୁପ୍ରିମକୋର୍ଟଙ୍କ ନିୟମାନୁସାରେ କେନ୍ଦ୍ରୀୟ ଲୋକସେବା ଆୟୋଗ (UPSC) ନିକଟକୁ ଯୋଗ୍ୟ ବରିଷ୍ଠ ଅଧିକାରୀଙ୍କ ତାଲିକା ପଠାଇ ସ୍ଥାୟୀ ଡିଜିପି ନିଯୁକ୍ତି ପ୍ରକ୍ରିୟା ଶେଷ କରିବେ।
