admin
ସୁନ୍ଦରଗଡ଼ ଲାଇଭ୍: ଚା’ର ମିଠା ଏବେ ପକେଟ୍ ଉପରେ ଭାରି ପଡ଼ୁଛି। ଗତ ଗୋଟିଏ ମାସ ମଧ୍ୟରେ ଦେଶରେ ଚିନି ଦର ହଠାତ୍ ବୃଦ୍ଧି ପାଇଛି। କିଲୋ ପିଛା ହାରାହାରି ଖୁଚୁରା ମୂଲ୍ୟ ୪୮.୧୮ ଟଙ୍କାରୁ ବଢ଼ି ୫୫.୭୦ ଟଙ୍କାରେ ପହଞ୍ଚିଥିବା ବେଳେ ରାଜ୍ୟର ବିଭିନ୍ନ ବଜାରରେ ଏହା ୬୦ ଟଙ୍କାରେ ବିକ୍ରି ହେଉଛି। ତେବେ ଇଥାନଲ ଉତ୍ପାଦନ ପାଇଁ ଚିନି ବ୍ୟବହାର ହେଉଥିବାରୁ ଦର ବଢ଼ୁଛି ବୋଲି ହେଉଥିବା ଚର୍ଚ୍ଚାକୁ କେନ୍ଦ୍ର ସରକାର ସମ୍ପୂର୍ଣ୍ଣ ଖଣ୍ଡନ କରିଛନ୍ତି।
ଉପଭୋକ୍ତା ବ୍ୟାପାର ମନ୍ତ୍ରଣାଳୟ ଅନୁଯାୟୀ, ଇଥାନଲ ଯୋଗୁଁ ନୁହେଁ ବରଂ ଆଖୁ ଫସଲ କ୍ଷତି, ଉତ୍ପାଦନ ହ୍ରାସ, ପର୍ବପର୍ବାଣୀ ପାଇଁ ଚାହିଦା ବୃଦ୍ଧି, ବିଶ୍ୱ ବଜାରରେ ଯୋଗାଣ ସମସ୍ୟା ଏବଂ ବ୍ୟବସାୟୀଙ୍କ କଳାବଜାରୀ ଯୋଗୁଁ ଏହି ଦରବୃଦ୍ଧି ଘଟିଛି। ଇଥାନଲ ଉତ୍ପାଦନ ପାଇଁ ବ୍ୟବହୃତ ଚିନିର ପରିମାଣ ବରଂ ୧୨% ରୁ କମି ୯% ରେ ପହଞ୍ଚିଛି ଏବଂ ଏବେ ଇଥାନଲ ପାଇଁ ଚିନି ବଦଳରେ ଅଧିକାଂଶ ମକା ଓ ଶସ୍ୟ ବ୍ୟବହାର କରାଯାଉଛି।
