admin
ସୁନ୍ଦରଗଡ଼ ଲାଇଭ୍: କେନ୍ଦ୍ର ସରକାରଙ୍କ ସଡ଼କ ପରିବହନ ମନ୍ତ୍ରଣାଳୟର ‘ଭେଇକିଲ୍ କ୍ଲାସିଫିକେସନ୍’ ଓ ପୁରୁଣା ଗାଡ଼ି ନୀତିକୁ ନେଇ ସାରା ରାଜ୍ୟରେ ଚର୍ଚ୍ଚା ଜୋର ଧରିଛି। ଏହି ନୂଆ ନିୟମ ଅନୁଯାୟୀ, କାଗଜପତ୍ର ନବୀକରଣ ହୋଇନଥିବା ଗାଡ଼ିଗୁଡ଼ିକୁ ରାସ୍ତାରୁ ହଟାଇବା ପାଇଁ ପ୍ରଶାସନ ପକ୍ଷରୁ କଡ଼ା ପଦକ୍ଷେପ ନିଆଯାଉଛି। ଏହାରି ଭିତରେ ଓଡ଼ିଶାରେ ପ୍ରାୟ ୨୦ ଲକ୍ଷ ଗାଡ଼ିର ପଞ୍ଜୀକରଣ ସାର୍ଟିଫିକେଟ୍ (ଆର୍ସି) ବାତିଲ୍ ହୋଇସାରିଥିବା ଦାବି କରାଯାଉଥିବା ବେଳେ, ଆଗାମୀ ଦିନରେ ଆହୁରି ୩୦ ଲକ୍ଷ ଗାଡ଼ି ରାସ୍ତାରୁ ହଟିବା ନେଇ ବଡ଼ ଆଶଙ୍କା ସୃଷ୍ଟି ହୋଇଛି।
ସବୁଠାରୁ ଚିନ୍ତାଜନକ ବିଷୟ ହେଉଛି, ଆର୍ସି ବାତିଲ୍ ସମ୍ପର୍କରେ ଗାଡ଼ି ମାଲିକମାନଙ୍କୁ ପୂର୍ବରୁ କୌଣସି ଲିଖିତ ସୂଚନା ମିଳୁନାହିଁ। ଫଳରେ ଲୋକେ ଅଜାଣତରେ ନିଜ ଗାଡ଼ି ରାସ୍ତାରେ ଚଳାଉଛନ୍ତି ଏବଂ ଯାଞ୍ଚ ସମୟରେ ଧରାପଡ଼ିବା ପରେ ହିଁ ନିଜ ଗାଡ଼ିର ଆର୍ସି ବାତିଲ୍ ହୋଇଥିବା ଜାଣିବାକୁ ପାଉଛନ୍ତି। ଆର୍ସି ବାତିଲ୍ ହୋଇଥିବା ଗାଡ଼ିଗୁଡ଼ିକ ରାସ୍ତାରେ ଚାଲିବା ପାଇଁ ଆଉ ବୈଧ ହୋଇନଥିବାରୁ ଗାଡ଼ି ମାଲିକମାନଙ୍କୁ ମୋଟା ଅଙ୍କର ଜରିମାନା ଗଣିବାକୁ ପଡ଼ୁଛି।
ପୁରୁଣା ଗାଡ଼ିର ଫିଟ୍ନେସ୍ ଓ କାଗଜପତ୍ର ନବୀକରଣ କରିବା ପ୍ରକ୍ରିୟା ବେଶ୍ ଜଟିଳ ଓ ଖର୍ଚ୍ଚାନ୍ତ ହୋଇଥିବାରୁ ସାଧାରଣ ଗାଡ଼ି ମାଲିକମାନେ ଅଧିକ ଚିନ୍ତାରେ ପଡ଼ିଛନ୍ତି। ଗାଡ଼ିଗୁଡ଼ିକ ଚଳାଚଳ ପାଇଁ ଅଯୋଗ୍ୟ ଘୋଷିତ ହେଲେ ଲୋକେ ବାଧ୍ୟ ହୋଇ ନୂଆ ଗାଡ଼ି କିଣିବେ। ଏହାଦ୍ୱାରା ବଜାରରେ ନୂଆ ଗାଡ଼ିର ଚାହିଦା ବୃଦ୍ଧି ପାଇବା ସହ ଗାଡ଼ି ଉତ୍ପାଦନକାରୀ କମ୍ପାନୀଗୁଡ଼ିକ ଲାଭବାନ ହେବେ ବୋଲି ସାଧାରଣରେ ଚର୍ଚ୍ଚା ହେଉଛି।
