admin
ସୁନ୍ଦରଗଡ଼ ଲାଇଭ୍(କୁଆଁରମୁଣ୍ଡା): ଝିଅ ଜନ୍ମ ହେବା ପରେ ସ୍ୱାମୀ ଘରୁ ବାହାର କରିଦେଇଥିବା ଏବଂ ଏବେ ପତ୍ନୀ ଓ ଝିଅଙ୍କୁ ଜୀବନରୁ ମାରିଦେବାକୁ ଧମକ ଦେଉଥିବା ନେଇ କୁଆଁରମୁଣ୍ଡା ଜମୁନାକି ଅଞ୍ଚଳର ଜଣେ ମହିଳା ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ଜମୁନାକି ଅଞ୍ଚଳର ମଞ୍ଜୁ ଦେବୀ (୩୭)ଙ୍କ ବିବାହ ସଞ୍ଜିତ କୁମାର ମହାତୋଙ୍କ ସହ ହୋଇଥିଲା। ବିବାହର ପ୍ରାୟ ଏକ ବର୍ଷ ପରେ ଝିଅ ଜନ୍ମ ହେବା ପରେ ସ୍ୱାମୀ ତାଙ୍କୁ ଘରୁ ବାହାର କରିଦେଇଥିବା ମଞ୍ଜୁ ଦେବୀ ଅଭିଯୋଗ କରିଛନ୍ତି।
ଏହାକୁ ନେଇ ମଞ୍ଜୁ ଦେବୀ ଗତବର୍ଷ ଅଦାଲତର ଆଶ୍ରୟ ନେଇଥିଲେ। ତାଙ୍କ କହିବା ଅନୁସାରେ, ଅଦାଲତ ସଞ୍ଜିତ କୁମାର ମହାତୋଙ୍କୁ ପ୍ରତିମାସ ୧୭,୦୦୦ ଟଙ୍କା ଭରଣପୋଷଣ ଦେବାକୁ ଆଦେଶ ଦେଇଥିଲେ। ତେବେ ଉକ୍ତ ଆଦେଶ ଅନୁଯାୟୀ ଭରଣପୋଷଣ ଟଙ୍କା ଦିଆଯାଉନଥିବା ଅଭିଯୋଗ ହୋଇଛି।
ଏହା ସହିତ ମଞ୍ଜୁ ଦେବୀ ଓ ତାଙ୍କ ନାବାଳିକା ଝିଅଙ୍କୁ ଜୀବନରୁ ମାରିଦେବାକୁ ଧମକ ମିଳୁଥିବା ନେଇ ମଧ୍ୟ ସେ ଅଭିଯୋଗ କରିଛନ୍ତି। ଏହି ଅଭିଯୋଗକୁ ନେଇ ମଞ୍ଜୁ ଦେବୀ IHRF (ଆନ୍ତର୍ଜାତୀୟ ମାନବାଧିକାର ବାହିନୀ)ର ରାଜ୍ୟ ସଭାପତି ବିଶ୍ୱଜିତ ମଲ୍ଲିକ ଏବଂ ସୁନ୍ଦରଗଡ଼ ଜିଲ୍ଲା ଅଧ୍ୟକ୍ଷା ସରୋଜିନୀ ବାଙ୍କରାଙ୍କ ନିକଟରେ ସହାୟତା ପାଇଁ ଆବେଦନ କରିଛନ୍ତି।
IHRF ପକ୍ଷରୁ ଘଟଣାରେ ତୁରନ୍ତ ପୋଲିସ ଓ ପ୍ରଶାସନ ହସ୍ତକ୍ଷେପ କରିବାକୁ ଦାବି କରାଯାଇଛି। ମଞ୍ଜୁ ଦେବୀ ଓ ତାଙ୍କ ନାବାଳିକା ଝିଅଙ୍କୁ ସୁରକ୍ଷା ଯୋଗାଇବା ସହ ଅଦାଲତଙ୍କ ଆଦେଶ ଅନୁଯାୟୀ ଭରଣପୋଷଣ ରାଶି ପ୍ରଦାନ ସୁନିଶ୍ଚିତ କରିବାକୁ ମଧ୍ୟ ଦାବି ହୋଇଛି।
