admin
ସୁନ୍ଦରଗଡ଼ ଲାଇଭ୍ : ସୁନ୍ଦରଗଡ଼ ଜିଲ୍ଲାର ହେମଗିର ବ୍ଲକ୍ ଅନ୍ତର୍ଗତ ଡୁଡୁକା ଗ୍ରାମରେ ବ୍ରାଉନ୍ ସୁଗାର କାରବାର ଅଭିଯୋଗରେ ପୁଲିସ ଚଢ଼ାଉ କରି ଦୁଇ ଜଣଙ୍କୁ ଗିରଫ କରିଛି। ଡୁଡୁକା କଲେଜ ପଛପଟ ପଡ଼ିଆରେ ବିଳମ୍ବିତ ରାତିରେ ଏହି ଚଢ଼ାଉ କରାଯାଇଥିବା ଜଣାପଡ଼ିଛି। ବିଶ୍ୱସ୍ତ ସୂତ୍ରରୁ ସୂଚନା ପାଇ ବଲିଙ୍ଗା ଫାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚି ଚଢ଼ାଉ କରିଥିଲା। ଏହି ସମୟରେ ମୋଟ ୮.୧୨ ଗ୍ରାମ ବ୍ରାଉନ୍ ସୁଗାର ଜବତ କରାଯାଇଥିବା ପୁଲିସ ପକ୍ଷରୁ ସୂଚନା ମିଳିଛି।
ଗିରଫ ଦୁଇ ଜଣ ହେଲେ ଡୁଡୁକା ଗ୍ରାମର ଭବାନୀ ନାଏକ (୩୯) ଏବଂ ଟିଠେଇଟାଙ୍ଗର ଗ୍ରାମର ମନୋଜ ଭୋଇ (୩୯)। ସେମାନଙ୍କ ନିକଟରୁ ବ୍ରାଉନ୍ ସୁଗାର ସହ ବ୍ୟବହୃତ ମୋବାଇଲ ଫୋନ୍ ଏବଂ ପ୍ରାୟ ୧୦,୫୦୦ ଟଙ୍କା ନଗଦ ଜବତ କରାଯାଇଛି। ଏନେଇ ହେମଗିର ଥାନାରେ କେସ୍ ନଂ-୩୭୪/୨୦୨୬, ଏନ୍ଡିପିଏସ୍ ଆଇନର ଧାରା ୨୧(ବି)/୨୯ ଅନୁଯାୟୀ ମାମଲା ରୁଜୁ ହୋଇଛି। ପରେ ଗିରଫ ଦୁଇ ଜଣଙ୍କୁ କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି।
ଖଣି-ଖାଦାନ ପାଇଁ ସୁନ୍ଦରଗଡ଼ ଜିଲ୍ଲାରେ ନିଜସ୍ୱ ପରିଚୟ ରଖିଥିବା ହେମଗିର ଅଞ୍ଚଳରେ ବ୍ରାଉନ୍ ସୁଗାର ଭଳି ନିଶାଦ୍ରବ୍ୟର କାରବାର ନେଇ ସ୍ଥାନୀୟ ମହଲରେ ଚିନ୍ତା ପ୍ରକାଶ ପାଉଛି। ନିଶାଦ୍ରବ୍ୟର କାରବାର ଯୁବପିଢ଼ି ଓ ସାଧାରଣ ପରିବାର ଉପରେ ନକାରାତ୍ମକ ପ୍ରଭାବ ପକାଇପାରେ। ତେଣୁ ଏଭଳି କାରବାର ଉପରେ ରୋକ୍ ଲଗାଇବା ପାଇଁ ପୁଲିସ ଓ ପ୍ରଶାସନ ପକ୍ଷରୁ ନିୟମିତ ଯାଞ୍ଚ ଏବଂ କଠୋର ଆଇନଗତ ପଦକ୍ଷେପ ନେବାକୁ ଦାବି ହେଉଛି।
