admin
ସୁନ୍ଦରଗଡ଼ ଲାଇଭ୍: ସୁଭଦ୍ରା ଯୋଜନାର ଟଙ୍କାକୁ ନେଇ ସୃଷ୍ଟି ହୋଇଥିବା ପାରିବାରିକ କଳହ ଶେଷରେ ଜଣେ ମହିଳାଙ୍କ ଜୀବନ ନେଇଛି। ଟଙ୍କା ନଦେବାରୁ ମଦ୍ୟପ ସ୍ୱାମୀ ନିଜ ସ୍ତ୍ରୀଙ୍କୁ ମାଡ଼ ମାରି ହତ୍ୟା କରିବା ପରେ ଘର ପଛପଟ ଲାଟ୍ରିନ୍ ଟାଙ୍କିରେ ମୃତଦେହ ଲୁଚାଇ ରଖିଥିବା ଅଭିଯୋଗ ହୋଇଛି। ଢେଙ୍କାନାଳ ସଦର ଥାନା ଅନ୍ତର୍ଗତ ଇନ୍ଦିପୁର ଜୁଆଙ୍ଗ ସାହିରେ ଘଟିଥିବା ଏହି ନିର୍ମମ ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
ପ୍ରାପ୍ତ ଅଭିଯୋଗ ଅନୁଯାୟୀ, ସୁଭଦ୍ରା ଯୋଜନାରେ ମିଳିଥିବା ସହାୟତା ଟଙ୍କା ନିଜ ହାତକୁ ନେବା ପାଇଁ ଅଭିଯୁକ୍ତ ମଦ୍ୟପ ସ୍ୱାମୀ ସ୍ତ୍ରୀଙ୍କ ସହ ପାଟିତୁଣ୍ଡ ଓ ଝଗଡ଼ା କରିଥିଲେ। ଏହି ବିବାଦ ଉଗ୍ରରୂପ ନେବାରୁ ସ୍ୱାମୀ ପ୍ରଚଣ୍ଡ ମାଡ଼ ମାରିବାରୁ ସ୍ତ୍ରୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ପୁଲିସଠାରୁ ବଞ୍ଚିବା ପାଇଁ ଅଭିଯୁକ୍ତ ଜଣକ ହତ୍ୟାକାଣ୍ଡ ପରେ ମୃତଦେହକୁ ଘର ପଛପଟେ ଥିବା ମଇଳା ଟାଙ୍କି ଭିତରେ ଫିଙ୍ଗି ଲୁଚାଇ ଦେଇଥିଲେ।
ଘଟଣା ସମ୍ପର୍କରେ ଖବର ପାଇ ଢେଙ୍କାନାଳ ସଦର ଥାନା ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୁଲିସ ଅଭିଯୁକ୍ତ ସ୍ୱାମୀଙ୍କୁ ଗିରଫ କରିବା ସହ ଘଟଣାସ୍ଥଳକୁ ନେଇ ‘ସିନ୍ ରିକ୍ରିଏସନ୍’ (ଘଟଣାର ପୁନରାବୃତ୍ତି) କରାଇଛି। ହତ୍ୟାକାଣ୍ଡର ପୂରା ପୃଷ୍ଠଭୂମି ଓ ଅନ୍ୟାନ୍ୟ କାରଣ ଜାଣିବା ପାଇଁ ପୁଲିସ ପକ୍ଷରୁ ଅଧିକ ଛାନଭିନ୍ ଜାରି ରହିଛି।
