ରାଜ୍ୟରେ ବନ୍ଦ ହେବ ଗୁଟଖା ବ୍ୟବସାୟ: ସବୁ ଆବେଦନକୁ ଖାରଜ କଲେ ହାଇକୋର୍ଟ

ସୁନ୍ଦରଗଡ଼ ଲାଇଭ୍: ଓଡ଼ିଶାରେ ଗୁଟଖା ଏବଂ ଚିୱିଙ୍ଗ୍ ଟବାକୋ (ଜର୍ଦ୍ଦା/ଖୈନି) ବ୍ୟବସାୟ ନିଷେଧ ନେଇ ଓଡ଼ିଶା ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଗତ ଜାନୁଆରୀ ୨୧ ତାରିଖରେ ଜାରି ହୋଇଥିବା ନିଷେଧାଦେଶ ବିଜ୍ଞପ୍ତିକୁ କୋର୍ଟ କାଏମ ରଖିବା ସହ ଏହା ବିରୋଧରେ ଆଗତ ସମସ୍ତ ପିଟିସନ୍‌କୁ ଖାରଜ କରିଦେଇଛନ୍ତି।

କୋର୍ଟ ନିଜ ରାୟରେ ସ୍ପଷ୍ଟ କରିଛନ୍ତି ଯେ, ବ୍ୟବସାୟିକ ସ୍ୱାର୍ଥ ଅପେକ୍ଷା ଜନସାଧାରଣଙ୍କ ସ୍ୱାସ୍ଥ୍ୟ ଓ ଜୀବନଧାରଣର ଅଧିକାର ଅଧିକ ଗୁରୁତ୍ୱପୂର୍ଣ୍ଣ। ଜନସ୍ୱାସ୍ଥ୍ୟର ସୁରକ୍ଷା କରିବା ରାଜ୍ୟ ସରକାରଙ୍କର ଏକ ମୌଳିକ କର୍ତ୍ତବ୍ୟ, ତେଣୁ ଏହି ବିଜ୍ଞପ୍ତି ସମ୍ପୂର୍ଣ୍ଣ ଆଇନସମ୍ମତ। ଗୋପାଳ ଆରୋମେଟିକ ସମେତ ୪ଟି ସଂସ୍ଥା ହାଇକୋର୍ଟଙ୍କ ଦ୍ୱାରସ୍ଥ ହୋଇ ଦର୍ଶାଇଥିଲେ ଯେ, ଚିୱିଙ୍ଗ୍ ଟବାକୋ ‘ଫୁଡ୍ ସେଫ୍ଟି ଆଣ୍ଡ ଷ୍ଟାଣ୍ଡାର୍ଡ ଆକ୍ଟ’ (FSSAI) ପରିସରଭୁକ୍ତ ନୁହେଁ। ଏହା ‘କୋଟପା’ (COTPA) ଆଇନ ଅଧୀନରେ ଆସୁଥିବାରୁ ରାଜ୍ୟ ସରକାର ଏହାକୁ ଖାଦ୍ୟ ଦର୍ଶାଇ ବ୍ୟାନ୍ କରିପାରିବେ ନାହିଁ।

ପ୍ରାରମ୍ଭିକ ଶୁଣାଣି ସମୟରେ କୋର୍ଟ ଅନ୍ତରୀଣ ରହିତାଦେଶ (Stay order) ଦେଇଥିଲେ। ମାତ୍ର ଚୂଡ଼ାନ୍ତ ଶୁଣାଣିରେ ବ୍ୟବସାୟୀଙ୍କ ସବୁ ଆବେଦନକୁ ଖାରଜ କରାଯାଇଛି। ଜାନୁଆରୀ ୨୧ର ବିଜ୍ଞପ୍ତି ‘ଖାଦ୍ୟ ସୁରକ୍ଷା ଓ ମାନକ ନିୟମାବଳୀ, ୨୦୧୧’ ଅନୁଯାୟୀ କାର୍ଯ୍ୟକାରୀ ହେବ। ଏହାସହ ଜିଏସ୍‌ଟି (GST) କର୍ତ୍ତୃପକ୍ଷଙ୍କ ଦ୍ୱାରା ନିଆଯାଇଥିବା କାର୍ଯ୍ୟାନୁଷ୍ଠାନଗୁଡ଼ିକ ଆଇନ ଅନୁସାରେ ପୃଥକ୍ ଭାବେ ବିଚାର କରାଯିବ। ହାଇକୋର୍ଟଙ୍କ ଏହି ରାୟ ପରେ ରାଜ୍ୟରେ ଗୁଟଖା ଓ ତମାଖୁଜାତ ଦ୍ରବ୍ୟର ବିକ୍ରି, ଉତ୍ପାଦନ ଓ ଯୋଗାଣ ସମ୍ପୂର୍ଣ୍ଣ ବେଆଇନ ହୋଇଛି।