admin
ସୁନ୍ଦରଗଡ଼ ଲାଇଭ୍: ବହୁ ଚର୍ଚ୍ଚିତ ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ଗିରଫ ହୋଇଥିବା ପୂର୍ବତନ ବିଧାୟକ ବିକ୍ରମ ପଣ୍ଡା ଆଜି ସନ୍ଧ୍ୟାରେ ଜେଲ୍ରୁ ବାହାରିଛନ୍ତି। ଓଡ଼ିଶା ହାଇକୋର୍ଟରୁ ଜାମିନ ମଞ୍ଜୁର ହେବା ପରେ ସେ ଜେଲ୍ରୁ ମୁକୁଳିଛନ୍ତି। ତାଙ୍କ ମୁକ୍ତି ପରେ ବିଜେଡି ନେତା ଓ କର୍ମୀମାନେ ବାଜାବାଣ ଓ ଶୋଭାଯାତ୍ରା ସହ ତାଙ୍କୁ ଉଚ୍ଛ୍ୱସିତ ସ୍ୱାଗତ କରିଛନ୍ତି। ଜେଲ୍ରୁ ବାହାରିବା ପରେ ଶ୍ରୀ ପଣ୍ଡା ଭାବବିହ୍ୱଳ ହୋଇ ଗଣମାଧ୍ୟମକୁ କହିଛନ୍ତି— “ମୋତେ ସତ୍ୟ ଓ ନ୍ୟାୟ ମିଳିଛି। ମୁଁ ଦଳ ଏବଂ ଗଞ୍ଜାମର ବିକାଶ ପାଇଁ ସଦାସର୍ବଦା କାମ କରିଆସିଛି। ଆଗାମୀ ଦିନରେ ବିଜେଡି ସୁପ୍ରିମୋଙ୍କ ମାର୍ଗଦର୍ଶନରେ ଆହୁରି ନିଷ୍ଠାର ସହ କାମ କରିବି।”
ଶ୍ରୀ ପଣ୍ଡାଙ୍କ ଗିରଫଦାରୀ ସମୟରେ ତାଙ୍କୁ ଗିରଫର କାରଣ ସମ୍ପର୍କରେ ଜଣାଯାଇ ନଥିଲା। ଗିରଫଦାରୀ ଅଧିକାରୀ ଆଇନଗତ ପ୍ରକ୍ରିୟା ସଠିକ୍ ଭାବେ ପାଳନ କରିନଥିବା କୋର୍ଟରେ ସ୍ପଷ୍ଟ ହୋଇଥିଲା। ସମ୍ବିଧାନର ଧାରା ୨୧(୧), ୨୨(୧) ଏବଂ ଭାରତୀୟ ନାଗରିକ ସୁରକ୍ଷା ସଂହିତା (BNSS), ୨୦୨୩ର ଧାରା ୪୭ ଓ ୪୮ ଅନୁଯାୟୀ କାରଣ ନଜଣାଇ ଗିରଫ କରିବା ନାଗରିକଙ୍କ ମୌଳିକ ଅଧିକାରର ଉଲ୍ଲଂଘନ। ସୁପ୍ରିମକୋର୍ଟଙ୍କ ପୂର୍ବ ରାୟ ଏବଂ ଆଇନଗତ ବ୍ୟବସ୍ଥାକୁ ଆଧାର କରି ହାଇକୋର୍ଟ ଏହି ଗିରଫଦାରୀକୁ ବେଆଇନ/ଅବୈଧ ଘୋଷଣା କରିବା ସହ ତାଙ୍କୁ ଜାମିନରେ ଛାଡ଼ିବାକୁ ନିର୍ଦ୍ଦେଶ ଦେଇଥିଲେ।
