admin
ସୁନ୍ଦରଗଡ଼ ଲାଇଭ୍: ଭାରତୀୟ ବଜାରକୁ ଆସିବାକୁ ଯାଉଛି ପ୍ଲାଷ୍ଟିକ୍ ବା ପଲିମର ନୋଟ୍। ବହୁଦିନର ଚର୍ଚ୍ଚା ପରେ ଏବେ ଏହି ଯୋଜନା ଉପରେ କେନ୍ଦ୍ର ସରକାର ମୋହର ମାରିଛନ୍ତି। ଭାରତୀୟ ରିଜର୍ଭ ବ୍ୟାଙ୍କ (RBI)ର ଏକ ପ୍ରସ୍ତାବକୁ ଅନୁମୋଦନ ମିଳିବା ପରେ ପ୍ରଥମ ପର୍ଯ୍ୟାୟରେ ୧୦ ଏବଂ ୨୦ ଟଙ୍କିଆ ପ୍ଲାଷ୍ଟିକ୍ ନୋଟ୍ର କ୍ଷେତ୍ର ପରୀକ୍ଷଣ କରାଯିବ।
ସାଂସଦ ରାମପ୍ରୀତ ମଣ୍ଡଳ ଏବଂ କୃଷ୍ଣା ଦେବୀ ଶିବଶଙ୍କର ପଟେଲଙ୍କ ପ୍ରଶ୍ନର ଉତ୍ତର ଦେଇ ଲୋକସଭାରେ ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ଏହି ସୂଚନା ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ ପ୍ଲାଷ୍ଟିକ୍ ନୋଟ୍ ଆସିବା ଦ୍ୱାରା ପୁରୁଣା କାଗଜ ନୋଟ୍ ବନ୍ଦ ହେବ ନାହିଁ, ବରଂ ଦୁଇଟିଯାକ ନୋଟ୍ ବଜାରରେ ଏକାଠି ଚାଲିବ। ଏହାସହ କ୍ୟାଶ୍ ଏବଂ ଡିଜିଟାଲ୍ ପେମେଣ୍ଟ ମଧ୍ୟ ପରସ୍ପରର ପରିପୂରକ ଭାବେ କାର୍ଯ୍ୟ କରିବ। ଏହି କ୍ଷେତ୍ର ପରୀକ୍ଷଣ ସଫଳ ହେଲେ ଭବିଷ୍ୟତରେ ବଡ଼ ଆକାରରେ ପ୍ଲାଷ୍ଟିକ୍ ନୋଟ୍ ଜାରି କରାଯିବ।
ସାଧାରଣତଃ ୧୦ ଓ ୨୦ ଟଙ୍କିଆ କାଗଜ ନୋଟ୍ ବହୁତ ଶୀଘ୍ର ଖରାପ ହୋଇଯାଉଥିବାରୁ ସରକାର ଏହି ପଦକ୍ଷେପ ନେଉଛନ୍ତି। ପ୍ଲାଷ୍ଟିକ୍ ନୋଟ୍ ଅଧିକ ଦିନ ତିଷ୍ଠି ରହିବା ଦ୍ୱାରା ବାରମ୍ବାର ନୂଆ ନୋଟ୍ ଛାପିବା ଏବଂ ପୁରୁଣା ନୋଟ୍ ନଷ୍ଟ କରିବାର ଖର୍ଚ୍ଚ ହ୍ରାସ ପାଇବ। ଏହାଛଡ଼ା ଏହି ନୋଟ୍ରେ ସ୍ୱଚ୍ଛ ୱିଣ୍ଡୋ ଓ ସ୍ୱତନ୍ତ୍ର ସୁରକ୍ଷା ସୂତ୍ର ଭଳି ଆଧୁନିକ ବ୍ୟବସ୍ଥା ରହିବ, ଯାହାଦ୍ୱାରା ନକଲି ନୋଟ୍ ତିଆରି କରିବା ଅସମ୍ଭବ ହୋଇପଡ଼ିବ।
ଏହି ପରୀକ୍ଷଣର ମୁଖ୍ୟ ଉଦ୍ଦେଶ୍ୟ ହେଉଛି ଭାରତର ବିଭିନ୍ନ ଅଞ୍ଛଳର ପାଣିପାଗ, ଆର୍ଦ୍ରତା ଏବଂ ଲୋକଙ୍କ ବ୍ୟବହାର ଶୈଳୀରେ ଏହି ନୋଟ୍ଗୁଡ଼ିକ କେତେ ଦୂର ଫଳପ୍ରଦ ହେଉଛି ତାହା ଯାଞ୍ଚ କରିବା। ଏଥିପାଇଁ RBI ପ୍ରଥମେ ଦେଶର ବିଭିନ୍ନ ଭାଗରେ ବହୁ ସଂଖ୍ୟାରେ ୧୦ ଓ ୨୦ ଟଙ୍କିଆ ପଲିମର ନୋଟ୍ ପ୍ରସାରିତ କରିବ।
